រឿងព្រេង អ្នកតា តាស្រី និង យាយបុស
អ្នកតានេះ ប្លែកអំពីអ្នកតាស្រុកឯទៀតៗ
។ អ្នកស្រុកហៅថា តាស្រីយាយបុស តាស្រីជាប្ដីយាយបុស
អ្នកតានេះនៅក្នុងវត្តព្រែកឯង ឃុំព្រែកឯង ស្រុកកៀនស្វាយ ខែត្រកណ្ដាល ។
មានរឿងដំណាលថា
ក្នុងរាជ្យនៃព្រះបាទអង្គច័ន្ទទ្រង់សោយរាជ្យរាជ្យនៅលង្វែក
ស្រុកខ្មែរយើងកើតសង្គ្រាមធំពន្លឹកអស្ចារ្យច្បាំងនឹងពួកយួន ។
ពួកយួនបោះឡើងមកវាយស្រុកខ្មែរច្រើនជាអនេក ។ ខ្មែរតទល់នឹងយួនពុំបាន
រត់ចូលពួនតែក្នុងព្រៃ ភ័យនឹងយួនធ្វើបាប ។ គ្រានោះ
កើតកោលាហលកាប់សម្លាប់គ្នាទៅវិញទៅមក ពួកយួនធ្វើបាបខ្មែរ
ដល់ថ្នាក់យកក្បាលខ្មែរ ធ្វើថ្មជើងក្រានដាំតែ
បានជាមានពាក្យពាក្យទំនៀមជាប់មកថា "កំពប់តែអុងៗ"
(សម័យនោះប្រហែលជាគ្រិស្តសករាជ ១៨០០) ។
ក្នុងខែភទ្របទ ជារដូវទឹកដំឡើងពេញទំហឹង
ហូរធ្លាក់ពីស្រុកលើចុះមកទន្លេមេកុង មានដើមគគីរ ១ ដើមរសាត់មកទាំងឫស
តាមដងទន្លេដែលហូរចុះទៅព្រៃនគរ ។ ដល់ត្រង់ព្រែកមួយហៅថា ព្រែកឯង
ដែលបែកចេញពីទន្លេ ទឹកហូរចូលតាមមុខវត្តនាំទាំងឈើនោះទៅផង
ហើយស្រាប់តែទៅជាប់ទើរនៅនឹងថ្កល់មុខវត្តនោះ
ហាក់ដូចជាសុំនៅទីនោះតែម្ដង ។
យប់នោះ លោកគ្រូចៅអធិការ
យល់សុបិនឃើញស្រីម្នាក់មកប្រាប់ថា
"ខ្ញុំករុណាជិះទូកមកពីស្រុកលាវ ឥឡូវនេះមកចតទូកនៅមុខវត្ត
សូមលោកគ្រូមេត្តាសង្គ្រោះ ឲ្យខ្ញុំករុណានៅនឹងវត្តនេះផង" ។
លុះភ្ញាក់ដឹងខ្លួនឡើង លោកគ្រូកើតសេចក្ដីពិភាល់ក្នុងព្រះហឫទ័យក្រៃពេក
នឹកពិចារណារកហេតុថា សុបិននិម្មិតនេះប្លែកអស្ចារ្យ
តាំងពីអាត្មាអញបួសមកនៅទីនេះ ពុំធ្លាប់ដែលឃើញសុបិននិម្មិតអ្វីចម្លែកបែបនេះម្ដងណាសោះ
។ លោកគ្រូត្រិះរិះរកហេតុ តាំងពីភ្ញាក់ដឹងខ្លួនឡើងដរាបទល់ភ្លឺ
ទើបនិមន្តទៅមុខវត្ត ឃើញដើមឈើ ១
ដើមទើរជាប់នៅនឹងដើមបបុសនៅមុខវត្តមែន ។ លោកក៏ប្រើក្មេងឲ្យចុះទៅមើល
ឃើញដុំថ្មមួយដុំជាប់នៅនឹងឫសគគីរ ក្មេងឃើញហើយ ស្រែកពិតលោកគ្រូថា
"ទានប្រោសមានដុំថ្មមួយដុំ ជាប់នៅនឹងឫសឈើ!” ។
លុះលោកគ្រូឃើញដុំថ្មពិតដូច្នោះ ទើបនិមន្តត្រឡប់មកកុដិវិញ
ប្រើក្មេងឲ្យវាយស្គរ ដើម្បីឲ្យដំណឹងដល់ពួកឧបាសកជើងវត្ត ។ ពួកឧបាសក
កាលបើឮសូរស្គរក៏មានសេចក្ដីសង្ស័យ
នាំគ្នាប្រញាប់ប្រញាល់មកកាន់ទីវត្តទាំងព្រឹកព្រហាម ។
លោកគ្រូដំណាលរឿងសុបិនប្រាប់ពួកឧបាសក តាមដែលលោកបានឃើញនោះសព្វគ្រប់ ។
ពួកឧបាសកមានសេចក្ដីត្រេកអរ ព្រមព្រៀងគ្នា អ្នកខ្លះរកឈើ
អ្នកខ្លះរកពូថៅ រណារ ចាប់ធ្វើខ្ទមមួយទំហំបណ្ដោយ ១ម.កន្លះ ទទឹង ១ម.
ដោយគ្រឿងឈើប្រក់ស្លឹកហើយស្រេចក្នុងថ្ងៃនោះ
នៅក្រោមដើមឈើទាលនាទិសអាគ្នេយ៍ព្រះវិហារ
(ខ្ទមនោះសព្វថ្ងៃក្លាយទៅជាកូនផ្ទះឈើប្រក់ក្បឿង) ។
លោកគ្រូចាត់មនុស្សឲ្យចុះទៅក្នុងព្រែកនឹងសែងយកដុំថ្មនោះឡើងមក ។
អ្នកចុះទៅយកដុំថ្មនោះ ស្រែកថា "យកមិនរួចទេ
ឲ្យចុះមកគ្នាច្រើនទើបយករួច" លោកគ្រូប្រើមនុស្សតាំងពី ៥
នាក់រហូតដល់ ៥០ នាក់ ក៏នៅតែមិនរួច សូម្បីតែកម្រើកបន្តិចក៏មិនកម្រើកផង
។ លោកគ្រូនិងពួកឧបាសក ពិគ្រោះគ្នាទៅឃើញថា "គួរឲ្យឆ្ងល់ណាស់
ក្រែងមានបីទាស់ហេតុអ្វី?” ទើបយកទៀនធូបអុជបួងសួងអញ្ជើញដុំថ្មនោះឡើងមក
ក៏នៅតែមិនរួចទៀត អស់មួយថ្ងៃក៏នាំគ្នាទៅផ្ទះរៀងៗខ្លួន ។
ក្នុងយប់នោះ
ស្រាប់តែពន្យល់សប្ដិលោកគ្រូម្ដងទៀតថា "សូមលោកគ្រូកុំប្រើមនុស្សប្រុសៗ
ឲ្យទៅយកខ្ញុំករុណា ខ្ញុំករុណាអៀនណាស់ មិនព្រមឡើងមកទេ
សូមប្រើតែមនុស្សស្រីៗទៅយកវិញ ទើបខ្ញុំករុណាព្រម" ។
លុះព្រឹកឡើងលោកគ្រូប្រើក្មេង ឲ្យវាយស្គរភ្ជុំពួកឧបាសក-សិកាម្ដងទៀត
ហើយលោកតំណាលរឿងដែលលោកឃើញហេតុជាគម្រប់ពីរដង ប្រាប់សព្វគ្រប់
ទើបប្រើមនុស្សស្រីៗចំនួន ៥នាក់ ឲ្យចុះទៅយកដុំថ្មនោះ ។
លុះពួកស្រីៗលូកដៃទៅស្ទាប់ភ្លាម ថ្មនោះហាក់ដូចជាអណ្ដែតតាមដៃមក
លើកឡើងដល់លើសែងយកទៅដាក់លើខ្ទមដោយស្រួល ។
លោកគ្រូចៅអធិការអង្គនោះ ប្រាប់ពួកឧបាសក-សិកាជើងវត្ត
ឲ្យធ្វើបុណ្យមួយតាមទំនៀម គឺធ្វើបុណ្យឡើងអ្នកតា
នៅពេលដែលយកថ្មពីក្នុងទឹកឡើងមកដាក់ក្នុងខ្ទម ។ បុណ្យនោះអធិកអធមណាស់
មានការជួបជុំពុទ្ធបរិស័ទជើងវត្តនិងជើងវត្តជិតខាងទៀត
មូលមកបួងសួងអំពាវនាវសុំឲ្យបានសេចក្ដីសប្បាយក្នុងស្រុកភូមិ
សុំឲ្យឈ្នះអស់មារសត្រូវ កុំឲ្យហ៊ានចូលមកយាយីឡើយ
ហើយសុំឲ្យស្រុកភូមិប្រកបរបររកស៊ីឲ្យបានផលសមតាមបំណង ។
រួចលោកអង្គនោះ សន្មតឈ្មោះប្រាប់ឲ្យអ្នកផងរាល់គ្នាស្គាល់ថា
អ្នកតានេះឈ្មោះ "យាយបុស" ព្រោះរសាត់មកទើរជាប់នឹងដើមបបុស
ទើបបានដាក់ជាប់ឈ្មោះដរាបមកដល់សព្វថ្ងៃនេះ ។
តង្វាយ:
យាយបុសទទួលតង្វាយខុសអំពីអ្នកតាឯទៀតៗ ដែលមាននៅក្នុងស្រុកខ្មែរ
ហើយដែលគួរឲ្យគេសម្គាល់បានថា យាយបុសមិនមែនជាតិខ្មែរទេ ពិតជាជាតិលាវ
ព្រោះស្រុកលាវទាំងមូលគេនិយមប្រើបាយដំណើបនិងប្រហុកសម្រាប់ទទួលទានធម្មតា
។ ឯយាយបុសធ្វើឲ្យមនុស្សឈឺ ច្រើនតែធ្វើមនុស្សប្រុសៗដែលចូលវត្ត
ហើយនិយាយពាក្យមិនសមគួរ ជាពាក្យអាសគ្រាម
គឺធ្វើឲ្យគ្រុនក្ដៅសន្លប់បាត់មាត់ បាត់ករភ័យផ្អែមមិនខាន ។ កាលបើគេដឹងថាយាយបុសធ្វើហើយ
គេអុជទៀនធូបនិយាយបន់ស្រន់ថា "បើយាយបុសធ្វើមែន ត្រូវឲ្យជាទៅចុះ
យើងថ្វាយបាយដំណើបនិងប្រហុកអាំង" ។ គ្រាន់តែនិយាយបន់ពីផ្ទះមក
ជំងឺនោះនឹងបានគ្រាន់ធូរស្រាលមួយរំពេច ។
តាស្រី អ្នកតា
តាស្រីនេះមិនមានរឿងទាក់ទងអំពីបូរាណមកទេ
គឺកើតដោយស្នាដៃលោកតាមួយអង្គដែលចាស់ហើយទៅបួស គឺថា
លោកមានប្រពន្ធកូនរួចហើយទើបរត់ទៅបួស
ហើយដែលតាំងពីដើមមកលោកអង្គនេះធ្លាប់ជាអ្នកលេងកំប្លែងច្រើនផង
មាននាមនិងគោត្តមិនប្រាកដផង អ្នកស្រុកសន្មតហៅថា
"លោកតាខាងត្បូងៗ"
សមនឹងហេតុដែលលោកសង់តូបនៅខាងត្បូងព្រះវិហារ ។
លោកនេះគិតថាយាយបុសគាត់នៅតែម្នាក់ឯង ហើយមកពីស្រុកឆ្ងាយផង
កាលនៅស្រុកគាត់ធ្លាប់មានប្ដី?
ឥឡូវនេះ មកនៅម្នាក់ឯងដូច្នេះពុំសមទេ" ។
លោកគិតហើយ ក៏តាំងធ្វើខ្ទមមួយ ពីខាងត្បូងប្របខ្ទមយាយបុស
រួចប្រើក្មេងឲ្យទៅបារដីឥដ្ឋយកមកសូនធ្វើជារូបអ្នកតាមួយឲ្យឈ្មោះថា
"តាស្រីៗ" រួចក៏ធ្វើឧបកិច្ចថា "តាស្រី!
តាឯងស្រឡាញ់យាយបុសទេ?” ឲ្យម្នាក់ឆ្លើយថា "ស្រឡាញ់" រួចសួរយាយបុសថា
"យាយបុសៗស្រឡាញ់តាស្រីទេ?” ឆ្លើយថា "ស្រឡាញ់"
លោកតាសួរយកចម្លើយតាស្រីនិងយាយបុស ដឹងថាព្រមព្រៀងគ្នាហើយ
ក៏និយាយបន្ថែមទៀតថា "នែតាស្រីយាយបុស
អាត្មាផ្សំផ្គុំទាំងពីរនាក់ឲ្យជាប្ដីប្រពន្ធនឹងគ្នាណា៎
គ្រាន់នឹងបានជាគ្នាពីរនាក់កុំឲ្យអផ្សុក ចូររក្សាកុំឈ្លោះគ្នា
ចាស់ៗហើយ" តែប៉ុណ្ណោះទុកជាការស្រេច ។
ដំណាលអំពីតាស្រី
ចាប់តាំងពីថ្ងៃដែលលោកតាអង្គនោះបានសន្មតតាំងឲ្យជាអ្នកតារួចហើយ
ក៏មានឫទ្ធិអំណាចកាច់ធ្វើគេធ្វើឯង ហាក់ដូចជាស្ដាប់បាន និយាយគ្នាបាន ។
កាលបើមានមនុស្សអុំទូកចេញចូលតាមព្រែកមុខវត្ត
(គឺមុខខ្ទមអ្នកតាតាស្រី) ឲ្យតែមានលេងសើចផ្ដេសផ្ដាសមិនគប្បី
តាស្រីធ្វើឲ្យចុកពោះមួយរំពេច ។
តង្វាយ: តាស្រីត្រូវការតែចេកនួន ១ស្និត
។ កាលបើមានជំងឺឈឺចុកពោះ អ្នកស្រុកគេយល់ថា: អ្នកតាធ្វើ ត្រូវអុជទៀនធូបនិយាយបន់ពីផ្ទះថា"ឲ្យតែលោកតាជួយឲ្យជាទៅចុះ
ខ្ញុំនឹងយកចេកនួនទៅថ្វាយ" ជួនកាលគ្រាន់តែនិយាយអំពីចម្ងាយ
ជំងឺនោះបានធូរទាន់មាត់ភ្លាម ។
សព្វថ្ងៃនេះ តាស្រីនិងយាយបុស
ហាក់ដូចជារកស៊ីចូលហ៊ុនគ្នា បើតាស្រីធ្វើឲ្យគេឈឺចុកពោះ
អ្នកស្រុកយកចេកទៅថ្វាយតាស្រី តោងថ្វាយបាយដំណើបនិងប្រហុក
ដល់យាយបុសផង ។ បើយាយធ្វើឲ្យគេឈឺគ្រុនក្ដៅ គេយកបាយដំណើប
និងប្រហុកទៅថ្វាយយាយបុស ត្រូវយកចេកនួនទៅថ្វាយតាស្រីផង
ទើបជំងឺនោះបានជាដាច់ស្រឡះ ។
រឿងព្រេង អ្នកតា តាស្រី និង យាយបុស
![រឿងព្រេង អ្នកតា តាស្រី និង យាយបុស]()
Reviewed by VannyDa
on
3:24 PM
Rating:
