រឿង នាងនាយចង្រ្កាន
លោក លាង-ហាប់-អាន សាស្រ្ដាចារ្យ
ពុទ្ធិកវិទ្យាល័យព្រះសុរាម្រឹត
រៀបរៀង
កាលណោះ មានមហាសេដ្ឋីម្នាក់ពោះម៉ាយ
បានរៀបការជាលើកទីពីរជាមួយនឹងស្រីម្នាក់ដ៏ល្អឯក ធ្វើជាភរិយា ។
នាងនោះមានកូនស្រីពីរនាក់មានមុខដូចៗគ្នាប៉េះបិទ ។
ចំណែកលោកសេដ្ឋីមានកូនស្រីដើមមួយនាក់ដែលមានលក្ខណៈសុភាពរាបទាប
ហើយស្រឡាញ់ម្ដាយចុងដូចជាម្ដាយខ្លួនបង្កើត ។
ប៉ុន្តែនាងម្ដាយចុងដែលជាអសប្បុរស
ក៏តែងច្រណែនធ្វើបាបនាងកូនដើមជាអនេក។ ហើយបានដាក់កំរិត ឲ្យបំពេញមុខការគ្រប់ចំពូកនៅក្នុងផ្ទះ
គឺឲ្យជូតក្ដារ លាងចាន បោកអ៊ុតខោអាវជូតសំអាតបន្ទាប់ខ្លួន
នឹងកូនសំណប់ទាំងពិរ ហើយចាត់ឲ្យនាងដេកនៅ តែក្នុងជង្រុកលើចម្បើង
ដ៏ស្កៀបរមាស់ ។ នាងកញ្ញានេះមានទុក្ខគ្រាំគ្រា ក្នុងខ្លួនតែឯកឯង នាងពុំហានជំរាបលោកបិតាឡើយ
ដោយមានសេចក្ដីកោតក្រែងដល់ម្ចាយចុង ។ ពេលធ្វើការ
នាងកញ្ញាតែងនៅពួនធ្វើតែម្នាក់ឯងចង្រុកក្នុងផ្ទះបាយ ។ ហេតុដូច្នោះហើយ
ទើបនាងបុត្រីច្បងបានសម្មត់ហៅចំអកថា នាងកញ្ជះចង្រ្កាន ។ ប៉ុន្តែ
នាងបន្ទាប់ហៅថា នាង នាយចង្រ្កាន ។
ពិត្រមែនតែនាងមានសម្លៀកបំពាក់ពុំគប្បី គង់នាងនៅល្អឆើត
ជាងបងជាបុត្រីម្ដាយចុងទាំងពីរ ។
សម័យមួយ ព្រះរាជបុត្រព្រះចៅសោយរាជ្យ
បានប្រកាសអញ្ជើញអស់ពពួកកញ្ញាទាំងឡាយ ដែលជាបុត្រីមហាសេដ្ឋី
នឹងនាម៉ឺនធំតូចទាំងឡាយចូលមករាំកំសាន្ត នៅក្នុងព្រះរាជដំណាក់ ។
នាងកញ្ញាបុត្រីចុងរបស់មហាសេដ្ឋីក៏ត្រូវគេអញ្ជើញទៅដែរ
ព្រោះនាងទាំងពីរនេះ មានឈ្មោះល្បីឯកក្នុងនគរ ។
នាងទាំងពីរក៏បានប្រុងប្រៀបសម្លៀកបំពាក់ យ៉ាងល្អទុកជាមុនស្រេច ។
លំដាប់នោះហើយ ដែលនាងនាយចង្រ្កានត្រូវទទួលងារអ៊ុតសំអាតសំលៀកបំពាក់ឲ្យបង
។ មាតាបានប្រើឲ្យគេអញ្ជើញជាងមកកាត់បូរសក់
ឲ្យបុត្រីទាំងពិរនឹងតែងខ្លួនតាមសម័យ ។
ពេលនោះបងទាំងពីរក៏បានប្រាប់សេចក្ដីអំពាវនាវ
របស់ព្រះអង្គម្ចាស់ដល់នាងនាយចង្រ្កាន ហើយក៏បានអនុញ្ញាតឲ្យនាងកាត់សក់កន្ទើងរើងនោះចោលចេញ
ជាមួយផង ។ កំពុងកាត់ នាងបងទាំងពិរក៏និយាយចំអកទៅថា
"យើមេនាយចង្រ្កាន តែងខ្លួនទៅព្រះរាជដំណាក់មហោស្រពដែរ! ហ៎
យ៉ាងណាទៅបើគេឃើញស្រីកញ្ជះចង្រ្កាន មកច្របូកក្នុងហ្វូងអ្នកមានមុខមាត់ធំៗយ៉ាងនេះ!”
។ នាងនាយចង្រ្កាននឹកខ្មាសសំដីបងណាស់ ប៉ុន្តែនាងពុំមានតបដោយកំហឹងសោះ
នាងគ្រាន់តែអង្វរថា "សូមបងកុំចំអកឲ្យខ្ញុំ" តែប៉ុណ្ណេះ ។
នាងទាំងពិរដោយសេចក្ដីអំនួតដ៏ក្រៃលែង
ក៏ភ្លេចភ្លាំងអាហារម្ហូបចំណីអស់ពីរថ្ងៃ ។ រាល់ពេលគេឃើញនាងទាំងពីរ
អង្គុយឆ្លុះកញ្ចក់មួយម្នាក់ តាក់តែងខ្លួន ។
ដល់កាលបរិច្ឆេទ
នាងទាំងពីរក៏បានបណ្ដើរគ្នាយ៉ាងប្រិមប្រិយទៅទីប្រជុំនោះ ។
ចំណែកនាងនាយចង្រ្កាន ដែលមានសេចក្ដីអន្ទះអន្ទែងចង់ទៅជាខ្លាំង
ក៏ខំដើរតាមមើលបងរហូតដល់ផុតកន្ទុយភ្នែក ។
មានចំណង់ណាស់នាងក៏ទៅជាស្រែកយំ នឹកតូចចិត្តតែខ្លួនឯង ។
មួយរំពេចស្រាប់តែមានស្រីម្នាក់រូបរាងស្អាត ចេញខ្លួនមកបង្ហាញនាង
សួរអំពីដំណើរដែលនាងយំនោះ ។ នាងកញ្ញាពុំបានប្រាប់សើ
ហើយរឹងរិតតែយំស្រណោះស្រណោកជាយ៉ាងខ្លាំង ។ ដោយអំណាចចិន្តាទិព្វ
របស់នាងទេពធីតាដែលជាម្តាយចិញ្ចឹម របស់នាងនាយចង្រ្កាន
ធីតាយល់ហេតុពិតថា នាងកញ្ញាមានចំណង់តៅលេងទីប្រជុំនឹងគេ ។
ទើបនាងនិយាយលួងលោកថា"អើ កូនស្រីម្ដាយ នាងច្បាស់ជាចង់ទៅកំសាន្ត
ជាមួយគេហើយ!ឯងនេះកុំស្មានថា គ្មានសំណាងឲ្យសោះ
កុំយំចាំម្ដាយបើកឲ្យទៅ" ។
តមកនាងទេពធីតាក៏នាំនាងនាយចង្រ្កានចូលទៅ
ក្នុងបន្ទប់ហើយស្រដីប្រើទៅថា
"ចូរកូនស្រីចូលតៅក្នុងសួនច្បារបេះផ្លែក្រូចមួយយកមកឲ្យម្ដាយ
" ។ នាងនាយចង្រ្កានមានអំណពេក ក៏ចុះទៅរកបេះផ្លែក្រុច
បានមួយយ៉ាងទុំរលោង មកជូននាងទេពធិតាដោយគិតក្នុងចិត្តាថា
តើផ្លែក្រូចនោះនឹងធ្វើយ៉ាងណាទៅ ឲ្យខ្លួនបានទៅទីប្រជុំនឹងគេនោះ ។
នាងទេពធិតាទទួលផ្លែក្រូចពីដៃបុត្រីចិញ្ចឹមហើយ ក៏បកយកសាច់ចោលចេញអស់
ទើបទាញចង្កឹះទិព្វវាយចង្អុលសេពអាគម ។ មួយរំពេច
សំបកក្រូចក៏ប្រែភេទទៅជាតួរទេះទូរមួយយ៉ាងថ្មីស្រឡាង ។
តមកនាងទេពធីតាក៏ចូលទៅលើកហិបតូចមួយ ហើយមានកណ្ដុរ៦ ។
ធីតាប្រាប់ឲ្យបុត្រីបើកគម្របង្ហើប
ឲ្យចេញម្ដងមួយៗទើបយកចង្កឹះទិព្វវាយលើខ្នងកណ្ដុរ ឲ្យប្រែភេទ
ទៅជាសេះយ៉ាងធំធាត់ទាំង៦ សំរាប់អូសរទេះ ។
បានដូច្នោះហើយ នាងកញ្ញាក៏ស្រដីទៅធីតាជាមាតាចិញ្ចឹមថា
"ចាំខ្ញុំទៅរកចាប់កណ្ដុរប្រែងមួយ មកជូនដើម្បីសេព
ឲ្យបានជាអ្នកបរទេះ!” ។ នាងទេពធីតាមានអំណរណាស់ក៏តបថា "អើប្រពៃណាស់កូនស្រី
ឯងទៅរកចាប់យកឲ្យឆាប់មក" ។
នាងនាយចង្រ្កានក៏បានទៅយកទ្រុងអង្គប់កណ្ដុរប្រែងមួយ
ដែលមានកណ្ដុរបីនៅក្នុងនោះ មកឲ្យមាតាទេពរើសយកមួយមកសេព
ឲ្យទៅជាអ្នកបររទេះម្នាក់យ៉ាងចំណាន ។ ហើយនាងធីតាបង្គាប់ទៅបុត្រីទៀតថា
"ចូរកូនរត់ទៅក្នុងសួនច្បារ
ឯងនឹងបានប្រទះឃើញបង្គួយប្រាំមួយនៅជើងរបង
ចូរឯងចាប់យកមកឲ្យឆាប់" នាងកញ្ញាស្ទុះរត់ទៅរក
ឃើញហើយក៏ចាប់យកមកជូនមាតា ដែលមានសេពមួយរំពេច ឲ្យទៅជាអ្នកបំរើទាំង
៦យ៉ាងរម្យទំ។
ស្រេចហើយនាងទេពធីតា ប្រាប់ទៅបុត្រីថា "ឥឡូវបានហើយ
ចូរកូនទៅលេងនឹងគេចុះ" ។ នាងបុត្រីស្រីដីថា
"អ្នកម៉ែឲ្យកូនទៅទាំងក្រខ្វក់យ៉ាងនេះ" ។ ថាដូច្នោះភ្លាម
នាងទេពធិតាក៏យកចង្កឹះទិព្វពាល់ទៅលើខ្លួននាង ។ មួយរំពេច
សម្លៀកបំពាក់ចាស់ក៏ប្រែភេទជាថ្មីហើយអង្គនាងក៏ស្រោចស្រក់ទៅដោយគ្រឿងអលង្ការមានខ្សែកដៃ
មាសពេជ្រចិញ្ជៀនភ្លឺចិញ្ចាច ។ ធីតាហុចស្បែកជើងកែវមួយគូ ឲ្យបុត្រី ពាក់
ហើយផ្ដាំផ្ដាច់ថា "ចូរកូនកុំនៅឲ្យហួសដល់អធ្រាត្រ
បើកូនមិនត្រឡប់មកពីមុនឲ្យទាន់ពេលវិញទេ រទេះនោះមុខជាទៅជាសំបកគ្រូច
សេះទៅជាកណ្ដុរបំរើទៅជាបង្គួយ ហើយសម្លៀកបំពាក់ថ្មី
ក៏ទៅជាចាស់ដូចដើមវិញ" ។ នាងបុត្រីទទួលពាក្យនាងទេពធីតាថា
នឹងវិលមកឲ្យទាន់ពេលវេលាដូចបណ្ដាំ ។
ដល់ក្នុងព្រះរាជដំណាក់
អ្នកផងបានឲ្យដំណឹងដល់ព្រះអង្គម្ចាស់ថា មានព្រះនាងក្សត្រីម្នាក់
ជិះរទេះទូរចូលមកដល់ហើយ ។ ឮដូច្នោះព្រះអង្គម្ចាស់ក៏យាងចេញមកទទួល ។
ព្រះអង្គម្ចាស់ទ្រង់ហុចដៃទទួលនាងឲ្យចុះមកដី ហើយទ្រង់អញ្ជើញចូលទៅ
ក្នុងមន្ទីរកំសាន្ដ ។មួយរំពេច សូរសម្លេងភ្លេងក៏ស្ងាត់ស្ងៀម ។ គេឮតែសូរមាត់សរសើរគ្រប់ៗគ្នា
ចំពោះសេចក្ដីល្អឆើតរបស់នាងនាយចង្រ្កានដាច់គេឯង ។
កុំថាឡើយដល់ទៅព្រះរាជា ដែលទ្រង់ជរាទៅហើយនោះ
ក៏គង់តែទ្រង់គយគន់ទតរំពៃមកលើរូបនាង ហើយទ្រង់សរសើរ
ចំពោះភក្រ្តព្រះអគ្គមហេសីថា ទ្រង់តាំងពីឡើងសោយរាជសម្បត្តិមក
ពុំដែលបានប្រទះឃើញកញ្ញាស្រស់ល្អឆើតយ៉ាងនេះសោះ ។
ស្រីៗទាំងអស់ខំផ្អៀងផ្អងគយគន់សម្លៀកបំពាក់ប្លែករបស់នាង
ពុំដាក់ភ្នែកសោះ ខ្លះខំចំណាំគំរូ ដើម្បីនឹងជួលជាងដៃឯកឲ្យកាត់តាម
នៅពេលដែលត្រឡប់ទៅផ្ទះវិញ ។
ព្រះអង្គម្ចាស់បានអញ្ជើញឲ្យនាងអង្គុយ នៅកន្លែងដ៏ឧត្តម
ហើយក៏ទ្រង់ អញ្ជើញឲ្យក្រោកឡើងរាំជាមួយព្រះអង្គ ។ ភ្លឹកនឹងអង្គនាង
ព្រះអង្គម្ចាស់ភ្លេចទាំងសោយចំណីផ្សេងៗ ដែលគេលើកយកមកថ្វាយស្មោះ ។
នាងកញ្ញាក៏បានក្រោកដើរទៅជិតបងស្រីទាំងពិរ
ដែលភាំងពុំស្គាល់នាងដល់បន្តិចសោះ ហើយគំនាប់ទទួលសេចក្ដីរាក់ទាក់
យ៉ាងស្និត្ធស្នាល ។ បន្តិចមកនាលោកាចង្អុលម៉ោង១១ សែសិបប្រាំនាទី
នាងកញ្ញាគំនាប់លាភៀវទាំងអស់ ព្រមទាំងថ្វាយបង្គំលាព្រះរាជា
វិលត្រឡប់មកផ្ទះវិញ តាមបណ្ដាំនាងមាតាទេព ។
ដល់ផ្ទះហើយនាងក៏ចូលទៅសំពះអរគុណមាតាទេព ។
នាងបានរ៉ាយរ៉ាប់ប្រាប់អំពីដំណើរ របស់នាងនឹងសេចក្ដីឆ្ងល់
របស់អ្នកទាំងអស់ ។ នាងជំរាបមាតាទេពថា
ព្រះអង្គម្ចាស់សូមអញ្ជើញនាងទៅកំសាន្ត នៅថ្ងៃស្អែកទៀត ។
កំពុងតែនិយាយស្រាប់តែឮសូរមាត់បងស្រីមកគោះទ្វារហៅ ។
នាងនាយចង្រ្កានស្ទុះចេញទៅទទួលបងដោយធ្វើជាស្លាប់ហើយយកដៃឈ្លីភ្នែក
មានសញ្ញាដូចជាទើបនឹងក្រោកពីដេក សើងមម៉ើងដូច្នោះ ។ មួយរំពេច
បងស្រីម្នាក់ស្រីអួតទៅនាងថា "នាយចង្រ្កានអើយ! បើឯងទៅមន្ទីរសំណាក់ផង
ប្រហែលជាឯងនឹកផ្លែកអស្ចារ្យ ដូចបងជាពុំខានហើយ វ៉ីអើយ
មានព្រះនាងក្សត្រីកញ្ញាម្នាក់រូបល្អឆើតរកស្រីក្រមុំប្រៀបគ្មាន
ហើយចេះគួរសមសុភាពរាបទាប
ទាំងបានគួរសមចែកផ្លែក្រូចដល់យើងទាំងពីរស៊ីផង យ៉ាងស្និទ្ធស្នាល
គ្មានឆ្មើងទេ នាងនាយចង្រ្កាន ក៏ធ្វើជាសួរឈ្មោះព្រះនាងក្សត្រីនោះ"
។ ប៉ុន្តែបងទាំងពីរតបមកវិញថា គេពុំដែលឃើញព្រះនាងនោះសោះ
ជាអង្វែងមកហើយ ព្រះអង្គម្ចាស់ទ្រង់សព្វព្រះហ្ឫទ័យ ភ្លេចទាំងក្រយាស្ងោយ
ទន់ដៃជើងអស់ ។ នាងនាយចង្រ្កានធ្វើជាសើចតបទៅវិញថា "យី
ល្អណាស់ហ្ន៎! ធ្វើម៉េចទៅឲ្យខ្ញុំបានឃើញផង ឳ!បើដូច្នោះ
សូមបងមេត្តាឲ្យខ្ញុំខ្ចីអាវចាស់ពណ៌លឿងមួយមក" ។
នាងបងស្រដីពេបជ្រាយទៅថា ហ៎!អីក៏គ្រាន់បើម្ល៉េះ មីកញ្ជះចង្រ្កាន
ឯងស្មានថា អញភ្លើនឹងឲ្យឯងខ្ចីផ្តេសផ្ដាសយ៉ាងនេះឫ " ។
ស្អែកឡើងនាងកញ្ញាទាំងពីរបានតែងខ្លួនទៅមន្ទីរប្រជុំកំសាន្តទៀត
។ ចំណែកនាងនាយចង្រ្កានក៏បានស្លៀកពាក់យ៉ាងល្អ
លើសលុបជាងថ្ងៃមុនឡើងជិះរទេះសេះដដែលបរចេញទៅ ។
ព្រះអង្គម្ចាស់ពេញទៅដោយសេចក្ដីត្រេកត្រអាល ក៏បានមកអង្គុយជិតប្រកៀក
ពិភាក្សានឹងនាងនាយចង្រ្កានក្សត្រី យ៉ាងស្និទ្ធស្នាល សប្បាយហួសប្រមាណ
នាងកញ្ញាភ្លេចពាក្យបណ្ដាំមាតាទេព ។ លុះនាលិការវាយម៉ោង ១២ គត់
នាងស្មានតែម៉ោង១១ ប៉ុណ្ណោះ ។
ប៉ុន្តែមួយរំពេចមកស្រាប់តែនាងក្រោកឈរឡើងសំពះគំនាបលាភ្ញៀវ ព្រមទាំងព្រះមហាក្សត្រ
នូវព្រះអគ្គមហេសី ស្ទុះរត់ចេញមកក្រៅជាប្រញាប់ ។ ឆ្ងល់ពន់ពេក
ព្រះអង្គម្ចាស់ក៏ដេញតាមនាងមកក្រៅប៉ុន្តែទ្រង់តាមពុំទាន់នាង ។
រហ័សដូចព្រួញ នាងកញ្ញាភ្លាត់ស្បែកជើងមួយចំហៀងធ្លាក់នៅលើអិដ្ឋ ។
ព្រះអង្គម្ចាស់ទ្រង់ស្ទុះទៅរស់យកមកទុកយ៉ាងប្រពៃ ។
នាងនាយចង្រ្កានដើរ ត្រឡប់មកផ្ទះវិញ
នៅសល់តែស្បែកជើងមួយចំហៀងជាលំអរ ។ សម្លៀកបំពាក់នាង
ប្រែភេទទៅជាចាស់ក្រខ្វក់ដូចដើម ចំណែករទេះសេះនឹងបំរើក៏ក្លាយភេទ
ទៅជាសត្វកណ្ដុរបង្គួយរត់បាត់អស់ ។ ព្រះអង្គម្ចាស់បានបញ្ជាក់សួរអ្នកយាមទ្វារថា
មានឃើញរទេះ ព្រះនាងក្សត្រីបរចេញទៅតាមទ្វារទេ ។
នាយឆ្មាំទ្វារទូលតបថា បានឃើញតែស្រីកំសាត់
ស្លៀកសំពត់អាវចាស់ម្នាក់រត់ចេញទៅ
តែប៉ុណ្ណេះដែលមានភាពជាកូនអ្នកស្រែស្មោះ ។
លុះនាងបងទាំងពីរត្រឡប់មកដល់ផ្ទះវិញ
នាងនាយចង្រ្កានក៏សួរបញ្ជាក់ អំពីសេចក្ដីសរសើរដល់ព្រះនាងក្សត្រី
ពីថ្ងសមុននោះ ។ នាងទាំងពីរបានរ៉ាយរឿងប្រាប់ថា ព្រះនាងកញ្ញានោះ
ប្រដាប់រឹងរឹតតែល្អជាងថ្ងៃមុនទៅទៀត ប៉ុន្តែដល់នាលិកាវាយម៉ោង១២
គត់ស្រាប់តែព្រះនាង ស្ទុះរត់ចេញភៀសខ្លួនបាត់ទៅ ។ ហើយដោយរហ័សពេក
ព្រះនាងក៏របូតស្បែកជើងម្ខាងធ្លាក់នៅលើអិដ្ឋ ។ ព្រះអង្គម្ចាស់
ក៏បានរើសស្បែកជើងកែវនោះទុក ហើយទ្រង់សព្វព្រះហឫទ័យ
ទៅដល់ព្រះនាងជាខ្លាំង សឹងផ្ទំពុំលក់ ។
រំលងប៉ុន្មានថ្ងៃក្រោយមក ដោយសេចក្ដីអន្ទះអន្ទែងទប់ពុំបាន
ព្រះអង្គម្ចាស់ក៏បានអំពាវនាវគ្រប់តំបន់ ដល់កញ្ញាទាំងឡាយ
ដែលមានទំហំជើងត្រូវនឹងស្បែកជើងនោះ នឹងបានឋានន្តរជាទីអគ្គមហេសី ។
ក្រុមព្រះញាតិវង្សទាំងអស់ បាននាំបុត្រីមកលជើង នឹងស្បែកជើងនោះ
ប៉ុន្តែពុំមានត្រូវដល់ម្នាក់សោះ ។
បន្ទាប់មកដល់វេណពួកបុត្រីឧត្តមមន្រ្តីរហូតដល់មន្រ្តីជាន់ទាប់
ប៉ុន្តែពុំមានល្មមជើងសោះ ។
គេក៏បាននាំបុត្រីលោកមហាសេដ្ឋីទាំងបីយកទៅឲ្យលទៀត ។
លុះឃើញបងប្រឹងស៊កពុំចុះហើយនាងនាយចង្រ្កានបន្លឺវាចា
ដោយស្អាល់ដាក់ជាស្បែកជើងរបស់ខ្លួនឡើងថា
"មើលឲ្យខ្ញុំលមើលតើប្រពៃទេ" ។ ឮដូច្នោះ
នាងបងទាំងពីរក៏នាំគ្នាសើចចំអកឲ្យនាងប្អូន ។ អ្នកប៉ាវគង ក៏សូមអញ្ជើញ
ឲ្យនាងនាយចង្រ្កានចូលមកលស្បែកជើងនោះ ។ នាងកញ្ញាក៏បានចូលទៅអង្គុយនៅកន្លែងដ៏សមគួរមួយ
ហើយនាយតម្រួត ក៏ទាញស្បែកជើងយកមកឲ្យនាងពាក់ល ។
នាងកញ្ញាទទួលសុពណ៌បាទមកពាក់ត្រូវក្លំ គ្មានចន្លោះ ។
អ្នកទាំងអស់ព្រមទាំងបងស្រីទាំងពីរ
ក៏នាំគ្នាភាំងឆ្ងល់សំឡឹងមើលមុខនាងនាយចង្រ្កានភ្លឹសៗ ។
ដើម្បីសហេតុឲ្យរឹងរឹតតែប្រាកដឡើង នាងក៏ដកទាញយកស្បែកជើងដូចគ្នា
មួយចំហៀងទៀតពីហោប៉ៅមកពាក់បង្ហាញអ្នកទាំងអស់ឲ្យឃើញជាក់ថា
ជារបស់នាងពិតៗ ហើយកាន់តែស្ងើចវាសនានាងទៅទៀត ។
មួយរំពេច នាងទេពធីតាជាមាតចិញ្ចឹម ក៏បានមកដល់ទីនោះ ។
នាងយកចង្កឹះទិព្វពាល់ទៅលើសម្លៀកបំពាក់ប្រាណនាង ។
មិនបានទាំងមួយជំទាស់ដៃផង ស្រាប់តែសំពត់អាវចាស់
ក្រខ្វក់ប្រែភេទទៅជាហូលឌិនចរល្បាប់ដ៏ភ្លឺរលើបរលោង
ប្រដាប់ដូវខ្សែមាសពេជ្រ ស្រោចស្រក់ទាំងកាយនាង ធ្វើឲ្យនាងបងទាំងពីរស្គាល់ជាក់ថា
នាងនាយចង្រ្កាននេះហើយ ដែលក្លែងខ្លួនជាព្រះនាងក្សត្រី
កាលដែលខ្លួនបានឃើញកោតគោរព សរសើរនៅក្នុងព្រះរាជមន្ទីរមហោស្រពនោះ ។
ទើបនាងទាំងពីរតក់ស្លុតឥតឧបមា
នឹកខ្មាសប្អូនពេកស្ទុះចូលទៅក្រាបឳបចើងនិយាយអង្វរ សូមទោសកុំឲ្យនាងប្រកាន់ឲ្យសោះ
កាលដែលខ្លួនបានធ្វើបាបមើលងាយពេបជ្រាយទាំងប៉ុន្មានអំពីមុននោះ ។
នាងនាយចង្រ្កានក៏ចាប់លើកបងទាំងពីរឲ្យក្រោកឈរឡើងហើយនិយាយរាក់ទាក់បញ្ជាក់ថា
ខ្លួនគ្មានកំហឹងគំនុំគុំគួនអ្វីឡើយគឺពិតជានៅស្រឡាញ់បងដូចបងបង្កើតពោះមួយៗជីវិត
។
ក្បួនប៉ាវគងក៏បានរៀបដង្ហែនាងនាយចង្រ្កានជិះលើចូលទៅក្នុងព្រះរាជវាំងថ្វាយចំពោះព្រះភក្រ្តព្រះអង្គម្ចាស់
ព្រមទាំងព្រះវរាជបិតាមាតានូវព្រះញាតិវង្សនឹងនាម៉ឺនសព្វមុខមន្រ្តីធំតូច
ដែលរង់ចាំទទួលនៅទីនោះ ។
លុះដល់ពេលាល្អ
ព្រះរាជាក៏បានរៀបអភិសេកព្រះរាជបុត្រនឹងនាងកញ្ញានាយចង្រ្កានជាទីអគ្គមហេសីយ៉ាងមហោឡារិក
។ លំដាប់មកព្រះអង្គក៏ទ្រង់ផ្ទេររាជ្យឲ្យព្រះរាជបុត្រគ្រងស្នង
ហើយនាងនាយចង្រ្កាន ក៏ឡើងឋានន្តរជាព្រះម្ចាស់ក្សត្រីយ៉ាងប្រាកដ ។
ព្រះនាងក៏បាននាំបងស្រីទាំងពីរ ចូលទៅនៅក្នុងមហាប្រាសាទជាមួយ
ហើយនៅថ្ងសអភិសេកជាមួយនោះ ព្រះនាងក៏បានរៀបការបងទាំងពីរនាក់
ឲ្យទៅនាម៉ឺនកម្លោះឯកយ៉ាងស្តុកអង់អាច ក្នុងព្រះរាជវាំងជាស្រេច ។
(ចប់)
|
រឿង នាងនាយចង្រ្កាន
![រឿង នាងនាយចង្រ្កាន]()
Reviewed by Admin
on
5:28 PM
Rating:
